December 6, 2021

NethTv.com

Hot & Fast News – Gossip – Sport News – Entertainment 24 Hours

අම්මා කෙනෙක්ගේ කදුළු කතාවක්

අපි, අපේ ගෑනු ළමයි දෙන්නාට උගන්වන්නේ රත්නපුරේ ඉස්කෝලෙක හොස්ටල් එකේ නතර කරලා. ඒ දෙන්නට මාසෙට දොළොස්දාස් පන්සීයක් යවන්න ඕන. පුතාලා දෙන්නා අම්මලා ළඟ ඉඳන් ඉස්කෝලේ යවනවා. ලේසි නෑ මහත්තයෝ මේ ගේම දෙන්න”ඒ මහියංගණයේ මහවැලි පාලම අසලදී මට හමු වූ තෙළිඟු බස කතා කරන ‘අහිගුණ්ඨික’ ප්‍රජාවට අයත් මවකගේ හඬයි. තිස්තුන් වියේ පසුවනඇය නමින් දේවදාස සෙල්වමලර්ය. ඇය සැමියා සමඟ හඳුන්කූරු අලෙවි කරමින් ජීවත් වන්නීය.“මේක විස්තර කතා කරන්න පුළුවන් වෙලාවක් නෙමෙයි මහත්තයෝ. කීයක් හරි හොයාගන්න තියෙන වෙලාව. හැන්දෑවේ හතරහමාර වෙනකොට අපි ගෙදර එනවා. වැඩි විස්තර දැනගන්න ඕන නම් ඒ වෙලාවට එන්න” යනුවෙන් කියමින් ඇය ‘රැහේ’ ඇත්තන් ජීවත් වන වාඩි දෙසට අත දිගු කරමින් ඉක්මන් ගමනින් මහියංගණ නගරය දෙසට ගියාය.ශ්‍රී ලංකාවේ ජීවත් වන තෙළිඟු බස කතා කරන ජනයා අතීතයේදී ස්ථිර වාසස්ථානයක් නොමැතිව, තැනින් තැනට යමින් ‘අහිගුණ්ඨික’ ජීවිත ගත කළහ. එහෙත් අද වන විට ඔවුන්ගෙන් කොටසක් ස්ථිර නිවාස සාදාගෙන ජීවත් වෙති.ස්ථිර නිවාස ඇතත් මුදල් ඉපැයීම සඳහා දිවයිනේ බොහෝ ප්‍රදේශවලට ගොස් කූඩාරම් තුළ ටික දිනක් ගත කරන ඔවුහු නැවත නිවාස වෙත පැමිණෙති. ගත වූ දශකය තුළ එම ජනයා භාවිත කරන පුද්ගල නාම, ඔවුන්ගේ ඇඳුම්, ආදායම් මාර්ග ඇතුළු බොහෝ දේ බෙහෙවින් වෙනස්වී ඇති බවක් දක්නට ලැබෙයි.‘අහිගුණ්ඨික’ ජීවිත පිළිබඳව වැඩි විස්තර දැනගැනීමේ අදහසින් මම සෙල්වමලර් දැනුම්දුන් වේලාවටත් පෙර ඔවුන්ගේ නවාතැන අසලට ගියෙමි.තෙළිඟු ජනයා “වාඩි” ලෙස හඳුන්වන ඔවුන්ගේ කූඩාරම් නිවාස තුළ කිසිවකු පෙනෙන්නට සිටියේ නැත. ඇතැම් “වාඩිවල” වහලය ගලවා දමා තිබූ අතර ඒවායේ ඉතිරිව තිබුණේ බිත්තිවලට ගත් කෝටු සැකිල්ල පමණි.සවස පහ පමණ වන විට ‘අහිගුණ්ඨික’ වාඩි ඉදිරිපිට රතු පැහැති ත්‍රිරෝද රථයක් නතර විය. ඉන් බැසගත්තේ සෙල්වමලර් සහ ඇගේ සැමියාය. සෙල්වමලර්ගේ අතෙහි මිරිස් තුනපහ අඩංගු ෂොපිං බෑගයකි. ඇගේ සැමියාගේ අතෙහි අලුතින් මිල දී ගත් වළඳකි.

“ දවල්ට මේ වාඩිවල කවුරුත් නෑනේ. තිබිච්ච හැළි වළං ටික ඊයේ මොකෙක් හරි හොරකම් කරලා. අපි අලුත් වළඳක් ගෙනාවා.” සෙල්වමලර්ගේ සැමියා, චමින්ද ප්‍රසාද් වික්‍රමසිංහ ත්‍රිරෝද රථයෙන් බැස ගත්තේ එසේ පවසමිනි.සෙල්වමලර්, සිය වාඩිය තුළට රිංගා ගත්තාය. කරත්ත අඹරාවක හැඩය ගන්නා එම නිවසේ ‍ෙදාරෙන් වැඩිහිටියකුට හිස පහත් නොකර ඇතුළු විය නොහැකිය. අඩි පහක් පමණ උස වාඩිය දිගින් අඩි නමයක් පමණ වෙයි. පළල අඩි හතක් තරම්ය. නිදන කාමරය, මුළුතැන්ගෙය, සාලය සියල්ලටම ඇත්තේ මේ සීමිත ඉඩකඩ පමණි. “නයි පෙට්ටිය” ආදී සියල්ල තැන්පත් කර ඇත්තේ ඒ තුළය. නිවෙස පිරිසුදු කිරීමට, අතුගෑමට කොස්සක් නොමැති නිසා සෙල්වමලර් රෙදි කැබැල්ලක් ගෙන පොළොව පිස දැමුවාය.මා සමඟ කතාබහ අතරතුර ‘චමින්ද’ රාත්‍රි ආහාර පිසීමට අවශ්‍ය දර රැගෙන ආවේය.“අපි රෑට තමයි හොඳට බඩ පිරෙන්න කන්නේ. ඒ වෙලාවට මාළු, කරවල නම් තියෙන්නම ඕන” යනුවෙන් චමින්ද පැවසුවේ ඔවුන් රැගෙන ආ මාළු ඇතුළත් බෑගය බිරිය අතට දෙමිනි.සෙල්වමලර් පළමුව සහල් ළිප මත තැබූ අතර සහල් සේදූ වතුරෙන්ම මාළුත් සේදුවාය.අනතුරුව ඇය පිසගත් බත ප්ලාස්ටික් බඳුනකට දමා එම ඇතිළියටම මාළු දමා එය ළිප මත තැබුවාය. මාළු පිසගත් සෙල්වමලර් එම ඇතිළියටම එළවළු වර්ග කීපයක් එකට දමා වෑංජනයක් සාදන අයුරු දක්නට ලැබිණි. මේ අතර රැකියාවට ගොස් සිටි ඔවුන්ගේ ‘රැහේ’ තවත් සාමාජිකයෙක් කූඩාරමට ළඟා විය.ඔහුගේ මුවින් මත්පැන් ගඳ වහනය විය. චමින්ද, මා කවුදැයි ඔහුට හඳුන්වා දීමෙන් පසු අමුත්තා මෙලෙස හඬ අවදි කළේය.“මගේ නම එච්.ඒ.සුගත්. මම සාත්තර කියනවා. අද අටදාහක් හෙව්වා. මට තියෙන ප්‍රශ්නය ‘අයිඩින්ටියක්’ නැති එක. අපට ස්ථිර පදිංචියක් නැති නිසා ග්‍රාමසේවක කෙනෙක් ළඟට ගියහම අයිඩින්ටි හදන්න බෑ කියනවා” සුගත් පවසයි.

තඹුත්තේගම සහ අන්දරවැව ඇතුළු ගම්මාන කීපයක තෙළිඟු ජනයා ස්ථිර නිවාස සාදාගෙන ජීවත්වන අතර ඔවුන් හැඳුනුම්පත් සකස් කරගෙන තිබේ. මෙම ගැටලුව පවතින්නේ එලෙස ස්ථිර නිවාස නොමැති පුද්ගලයන්ට පමණි. මේ අතර ඇතැමුන් කුලී පදනම මත නිවාස ලබාගෙන එම ලිපිනයන් භාවිත කර හැඳුනුම්පත් සාදාගෙන ඇති බවද ඔවුන් සමඟ කළ කතාබහේදී දැන ගන්නට ලැබිණි.මම මින් පෙරත් අවස්ථා කීපයකදීම අහිගුණ්ඨික ජනයා සමඟ අදහස් හුවමාරු කරගෙන ඇත්තෙමි. එහිදී මට පැහැදිලි වූයේ මොවුන් දිවා කාලයේදී රැකියා සඳහා යන විට ‘වාඩි’ මුරකිරීම සඳහා බොහෝ විට එක් පුද්ගලයකු නතර කරන බවය. ඔහු වාඩි මුර කිරීම වෙනුවෙන් එක් වාඩියකින් රුපියල් දෙසීය බැගින් අය කරනු ලැබේ.තෙළිඟු බස කතා කරන මොවුන් ඉන්දියාවේ සිට ලංකාවට පැමිණි බව විශ්වාස කෙරේ. ලංකාවේ ‘අහිගුණ්ඨික’ ජනයා ඉන්දීය ‘කුරවර්’ ගෝත්‍රයට සමානකම් දක්වන බව පර්යේෂකයන්ගේ අදහසය. එහෙත් අද ඔවුන්ගෙන් බොහෝ දෙනා සිංහල බස කතා කරති. එමෙන්ම පිරිමින් මෙන්ම කාන්තාවන්ද මත්පැන් පානයට යොමුවී ඇත.“මෙතන හිටපු ගොඩක් කට්ටිය බිබිල වගේ පැතිවලට ගියා. මොකද දන්නවද? මහියංගණ පන්සලේ පෙරහර නිසා මේ දවස්වල මෙහේ ‘බාර්’ වහලනේ. අනික පොලිසියෙන් දාලා අපිව එළවනවා, යනුවෙන් චමින්ද පැවැසුවේ දිග සුසුමක් හෙළමිනි.නයි නැටවීම, රිළවුන් නැටවීම, පිඹුරන් සමඟ කරන ත්‍රාසජනක ක්‍රියා ප්‍රදර්ශනය ආදියෙන් ඔවුහු මුදල් උපයා ගනිති.ගමින් ගමට ඇවිදිමින්, නයි නටවමින් ජීවත් වූ අහිගුණ්ඨික ගෝත්‍රයක් ගැන පන්සිය පනස් ජාතක පොතේ ‘චම්පෙයිය’ ජාතකයෙන් සහ සද්ධර්මාලංකාරයේ ‘අහිගුණ්ඨික වත්ථු’ මඟින් පැහැදිලි වෙයි.තැනින් තැනට යෑමේදී බඩු ගෙනයාම සඳහා යොදාගත් බූරුවා සහ ආරක්ෂාවට මෙන්ම දඩයම් කිරීමට සහාය වන බල්ලා අතීතයේදී මොවුන්ගේ ජීවිතය හා බැඳුණු සත්තු වෙති.හින්දු ආගම අදහන මෙම ජනයා පෝය දිනවල සතුන් මැරීමෙන් වැළකී සිටිති. සාස්තර කීම ප්‍රධාන වශයෙන් සිදු කරන්නේ අහිගුණ්ඨික කාන්තාවන් විසිනි. වැසි දිනවලදී මේ කුඩාරම් තුළ සිටීම ඉතා අපහසුය. විශේෂයෙන්ම රාත්‍රි කාලයේදී සර්පයන් දෂ්ට කිරීම්ද සිදුවන බව සෙල්වමලර් පවසන්නීය.“නෝනා, දෙන්න මගේ ෆෝන් එක. මම පෙන්නන්නම් ඊයේ රෑ වාඩියට ඇදුණු පොළොන් දණ්ඩා” යනුවෙන් පැවැසූ චමින්ද ඔහුගේ ජංගම දුරකථනයෙන් ලබාගත් ඡායාරූපයක් පෙන්වීය.චමින්ද වැඩිදුරටත් පැවැසුවේ දරුවන්ටත් මෙම දුක්බර ජීවිතය විඳීමට ඉඩ තැබිය නොහැකි නිසා පාසල් නිවාඩු කාලයට දරුවන් නැන්දණියගේ නිවෙසට හෝ කුලී නිවෙසකට කැඳවාගෙන ගොස් ඔවුන් සමඟ එහි නිවාඩු කාලය ගත කරන බවය. තමන්ගේ රැහේ නායකයා තඹුත්තේගම සිටින බවත් ගැටලු ඇතිවන විට ඔහු සමඟ සාකච්ඡා කරන බවත් චමින්ද වැඩිදුරටත් පවසයි.“සමහර වෙලාවට අපට පොලිසිවලින් කේස් එනවා. ඒ වෙලාවට අපේ ප්‍රධානියා මැදිහත් වෙලා ඒවා විසඳලා දෙනවා” ඒ සෙල්වමලර්ගේ හඬයි.‘අහිගුණ්ඨික’ ජනයා දැන් දේශපාලනය කෙරෙහිද උනන්දුවක් දක්වති. තෙළිඟු බස කතා කරන ‘මුණියන්ඩිගේ ධර්මේ’ පසුගිය පළාත් පාලන මැතිවරණයේදී තලාව ප්‍රාදේශීය සභාවට තරග කොට ඇත.බොහෝ වේලාවක් කතාබහ කරමින් සිටින අතර කෙමෙන් අඳුර ගලමින් තිබිණි. සෙල්වමලර් කුප්පි ලාම්පුවක් දැල්වූවාය. ඔවුන්ගෙන් සමුගත් මොහොතේ සෙල්වමලර් මෙසේ සඳහන් කළාය.“ මහත්තයෝ, ඔය මොනවා ලියාගෙන ගියත් වැඩක් නෑ, අපේ ප්‍රශ්න ටික විසඳලා දෙන්නේ නැත්නම්”(ෂර්ලි උපුල් කුමාර බී.බී.සී. (සිංහල))